МАҶЛИСИ НАВБАТИИ ГУРӮҲИ МУШТАРАКИ НАЗОРАТӢ

                    Душанбе, 12 май. (АМИТ «Ховар», Наргис Бояхмедова). — Дар Душанбе маҷлиси навбатии 20 — уми Гурӯҳи муштараки назоратии ҳалли проблемаҳои сарҳад баргузор гардид. Дар он намояндагони сохторҳои низомӣ ва дипломатии Тоҷикистон, Қазоқистон, Қирғизистон, Русия ва Ҷумҳурии Мардумии Чин ширкат варзиданд.                   Мухбири АМИТ «Ховар» хабар медиҳад, ки маҷлиси мазкур ҳар сол ду маротиба фаслҳои баҳору тирамоҳ дар яке аз мамлакатҳои ҳамсарҳади Чин ва дар худи ин мамлакат гузаронида мешавад. Дар маҷлис масъалаҳои таъмини амният дар сарҳад ва ҷузъу томҳои низомии дар минтақаи сарҳад ҷойдодашуда баррасӣ карда мешаванд.                    Маҷлиси бистуми Гурӯҳи муштарак ба 10 — солагии таъсиси он рост омад ва дар фазои амалию судбахш, эҳтироми ҳамдигар ва ҳусни тафоҳум гузашт. Маҷлис таҳти раёсати намояндагии Тоҷикистон баргузор гардид. Дар фарҷоми он қарорҳои дахлдор қабул шуданд.