МАШВАРАТ ДАР САМАРА

                        Душанбе, 20 май. (АМИТ «Ховар», Анварбек Сиддиқов). — 21 май дар меҳмонхонаи «Ренессанс» — и шаҳри Самара машварат баргузор мегардад, ки дар он проблемаҳои ҳифзи ҳуқуқи коргарони муҳоҷири тоҷик дар вилояти мазкур баррасӣ карда мешаванд. Дар он намояндагони Раёсати корҳои дохилии вилояти Самара, роҳбарон ва намояндагони хадамоти муҳоҷирати вилоят, маъмурияти вилоят, муассисаи давлатии «Қасри Дӯстии халқҳо», инчунин, Созмони ҷамъиятии «Мусоидат ба рушди фарҳанги тоҷикон — «Сомониён» — и вилояти Самара ширкат меварзанд.                      Аз Раёсати муҳоҷирати ВКД Ҷумҳурии Тоҷикистон ба АМИТ «Ховар» хабар доданд, ки дар машварат намояндагони созмонҳои байналхалқӣ, ғайриҳукуматӣ, мақомоти муҳофизи қонун ва намояндагони баъзе воситаҳои ахбори оммавии Тоҷикистон сухан хоҳанд кард.                    Мухбири АМИТ «Ховар» хабар медиҳад, ки машварати мазкур бо ташаббуси Раёсати муҳоҷирати ВКД Тоҷикистон ва кӯмаку дастгирии созмонҳои байналхалқӣ, аз ҷумла, намояндагии «Пажӯҳишгоҳи ҷомеаи кушод — Бунёди мадад» дар Тоҷикистон, созмони байналхалқии меҳнат ва агентии рушди техникии «Актед» дар Тоҷикистон гузаронида мешавад.