МУҲОКИМАИ МАСЪАЛАҲОИ ТАЙЁРӢ БА МУЛОҚОТИ САРОНИ ҲУКУМАТҲОИ ИДМ

                        Маскав, 20 май. (АМИТ «Ховар», Ҳалима Хушқадамова ). — Раиси Ҳукумати Федератсияи Русия Владимир Путин 19 май дар Маскав бо раиси Кумитаи иҷроия — котиби иҷроияи Иттиҳоди давлатҳои мустақил С.Лебедев мулоқот кард. Онҳо масъалаҳои тайёриро ба маҷлиси Шӯрои сарони ҳукуматҳои ИДМ баррасӣ намуданд, ки 22 май дар Остона баргузор мегардад.                        С.Лебедев зикр намуд, ки дар маҷлис силсилаи ҳуҷҷатҳои муҳим муҳокима карда мешаванд. Ин ҳуҷҷатҳо ривоҷ додани ҳамкории мамлакатҳои Иттиҳодро дар соҳаҳои иқтисодӣ, гуманитарӣ ва амният пешбинӣ менамоянд. Яке аз онҳо нақшаи тадбирҳои амалӣ сохтани даври аввали барномаи стратегии рушди иқтисодӣ мебошад. Нақшаи мазкур тадбирҳои мушаххасро дар бобати густариши ҳамкорӣ пешбинӣ мекунад. Коршиносони мамлакатҳои ИДМ нақшаро дар давоми бештар аз ним сол таҳия намуда, дар он оқибатҳои бӯҳрони ҷаҳонии иқтисодиро ба назар гирифтанд. Тадбирҳои пешбинишуда имкон медиҳанд, ки оқибати бӯҳрон бо ҷидду ҷаҳди муштарак бартараф карда шавад.                         С.Лебедев афзуд, ки дар маҷлиси Шӯрои сарони ҳукуматҳо, инчунин, нақшаи хамкории гуманитарӣ баррасӣ карда хоҳад шуд. Онро роҳбари Шӯро Поллиева Ҷаҳон Раҷабовна ба иштирокчиёни маҷлис пешниҳод менамояд.                         Аз Кумитаи иҷроияи ИДМ ба АМИТ «Ховар» хабар доданд, ки дар маҷлиси сарони ҳукуматҳои ИДМ ҳайатҳои 11 давлат ширкат меварзад. Дар он намояндагони Гурҷистон иштирок намекунанд.