МУАРРИФИИ ТОҶИКИСТОН ТАВАССУТИ КИТОБ

                        Душанбе, 18 май.(АМИТ «Ховар», Марзия Саидова).-Муассисаҳои табъу нашри ҷумҳурӣ аз 22 -умин намоишгоҳи байналмилалии «Китоби Теҳрон» баргаштанд.                         Назар ба иттилои директори китобхонаи миллии Тоҷикистон ба номи Абулқосим Фирдавсӣ Шариф Тошев дар намоишгоҳ, ки дар масоҳати 60 гектар ташкил гардида буд, намояндагони табъу нашри 160 давлати ҷаҳон иштирок дошт.                        Аз Ҷумҳурии Тоҷикистон дар ин чорабинии бузурги фарҳангӣ муассисаҳои табъу нашр, ба мисли «Адиб», «Ирфон», Маориф ва фарҳанг», «Эҷод» ва «Истиқбол» ширкат варзида, 140 номгӯй китобҳои тозанашрро ба намоиш гузоштанд. Ин китобҳо ба мавзӯҳои сиёсию иқтисодӣ, иҷтимоию фарҳангӣ бахшида шуда, шаҳодати рушди китобдорӣ ва табъу нашр дар ҷумҳуриамон мебошанд. Хусусан, гӯшаи Тоҷикистонро дар намоишгоҳи «Китоби Теҳрон», китобҳои Президенти ҷумҳурӣ Эмомалӣ Раҳмон ва дигар адабиёте, ки ба тамаддуну давлатдории тоҷикон бахшида шуда буд, шукӯҳи тоза бахшиданд.                         Бояд тазаккур дод, ки намоишгоҳ бо мақсади рушди китобдорӣ, табодули таҷриба, ба роҳ мондан ва тақвияти ҳамкорӣ байни ноширони кишварҳои гуногуни ҷаҳон ташкил карда шуд.                          Шариф Тошев афзуд, ки дар намоишгоҳ намояндагони Тоҷикистон натанҳо дастовардҳои соҳаи табъу нашрро ба маърази тамошо гузоштанд, балки Тоҷикистонро ба намояндагони дигар кишварҳо муаррифӣ намуданд. Тамошобинон ба адабиёте, ки ба ҷуғрофия ва фарҳангу таърихи Тоҷикистон бахшида шуда буданд, бештар таваҷҷӯҳ зоҳир карданд. Мо ният дорем, ки як шумораи маҷаллаи «Китобдор»-ро, ки нашрияи Китобхонаи миллии Тоҷикистон ба номи Абулқосим Фирдавсӣ аст, пурра ба фаъолияти намоишгоҳи «Китоби Теҳрон» бахшем, гуфт дар хотима Ш.Тошев.