МУЛОҚОТИ ВАЗИРИ КОРҲОИ ХОРИҶИИ ТОҶИКИСТОН БО РАИСИ БОНКИ ИСЛОМИИ РУШД

                      Душанбе, 25 май. (АМИТ «Ховар», Фарангис Раҳимова). — Вазири корҳои хориҷии Ҷумҳурии Тоҷикистон Ҳамрохон Зарифӣ дар ҳошияи иштирокаш дар кори иҷлосияи 36-уми Шӯрои вазирони корҳои хориҷии давлатҳои узви Созмони Конфронси исломӣ шаҳри Димишқ 23 май бо Раиси Бонки исломии рушд доктор Аҳмад Муҳаммад Алӣ мулоқот анҷом дод.                      Тавре ба АМИТ «Ховар» аз Департаменти иттилооти Вазорати корҳои хориҷии ҶТ хабар доданд, дар вохӯрӣ масъалаҳои ҳамкорӣ миёни Тоҷикистону Бонки исломии рушд мавриди баррасӣ қарор гирифтанд.                       Дар ҷараёни сӯҳбат Ҳамрохон Зарифӣ дар бораи ҳолат ва пешомадҳои ҳамкориҳои ҷумҳурӣ бо кишварҳои мусулмонӣ иттило дода, ҳамчунин таваҷҷӯҳи мусоҳибашро ба татбиқи як қатор лоиҳаҳои ҷумҳурӣ ҷалб намуд, ки барои рушди ҳамкориҳо дар минтақа аҳамияти калон дошта метавонанд.                       Аҳмад Муҳаммад Алӣ омодагии бонки исломиро барои минбаъд низ саҳм гузоштан дар татбиқи лоиҳаҳои зербиноии Тоҷикистон таъкид намуд.                      Дар рафти мулоқот ҳамчунин ба таваҷҷӯҳи Раиси Бонки исломии рушд муроҷиатномаи Ҳукумати Ҷумҳурии Тоҷикистон барои дарёфти кӯмаки фаврӣ ба минтақаҳои зарардида аз обхезиҳои рӯзҳои охир расонида шуд.