МУЛОҚОТИ ВАЗИРОНИ КОРҲОИ ХОРИҶИИ ТОҶИКИСТОНУ ИРОҚ

                         Душанбе, 25 май. (АМИТ «Ховар», Наргис Бояхмедова). — Вазири корҳои хориҷии Ҷумҳурии Тоҷикистон Ҳамрохон Зарифӣ дар Димишқ бо Вазири корҳои хориҷии Ҷумҳурии Ироқ Ҳушёр Зиборӣ мулоқот кард.                         Дар ҷараёни мулоқот масъалаҳои гуногуни мавриди таваҷҷӯҳ баррасӣ шуда, пеш аз ҳама алоқамандии ду кишвар барои барқарор намудани муносибатҳои дӯстӣ ва ҳамкорӣ таъкид гардид.                         Мавзӯи ташаббуси Президенти Ҷумҳурии Тоҷикистон Эмомалӣ Раҳмон дар бораи Соли бузургдошти Имоми Аъзам Абӯҳанифаи Нӯъмон эълон гардидани соли 2009 дар маркази диққати ҳамсӯҳбатон қарор гирифт. Дар робита ба ин, зимни қадрдонӣ аз бузургдошти ин чеҳраи намоёни ҷаҳони ислом, Ҳушёр Зиборӣ иброз намуд, ки намояндагони кишвараш дар чорабиниҳои ҷашнӣ дар Душанбе фаъолона иштирок хоҳанд кард. Вазири ироқӣ ҳамчунин ба мулоқотҳои сегонаи вазирони корҳои хориҷии Тоҷикистон, Афғонистон ва Эрон ҳангоми ҷашни Наврўз мароқи калон зоҳир намуда, омодагии худро барои иштирок дар мулоқоти ояндаи онҳо изҳор дошт.