НАҚШИ ОСИЁИ МАРКАЗӢ ДАР БАРТАРАФ СОХТАНИ БӮҲРОНИ ИҚТИСОДӢ

                      Душанбе, 18 май. (АМИТ «Ховар», Фарангис Раҳимова). — Дар қароргоҳи марказии СММ дар Ню — Йорк маҷлиси Комиссияи рушди устувор баргузор гардид. Дар маҷлис масъалаҳои марбут ба рушди соҳаи кишоварзӣ, ҳалли проблемаҳои соҳа, истифодаи оқилонаи замин, биёбоншавии киштзор ва рушди соҳаи кишоварзӣ дар мамлакатҳои Африқо муҳокима шуданд. Намояндаи доимии Туркманистон дар СММ Оқсултон Атоева изҳор намуд, ки мамлакатҳои Осиёи Марказӣ дар бобати бартараф сохтани бӯҳрони ҷаҳонии озуқаворӣ нақши муҳим бозида метавонанд. Мавсуф пешниҳод намуд, ки дар шаҳри Ашқобод Дафтари минтақавии озуқаворӣ ва кишоварзии СММ ташкил карда шавад.                     Намояндаи Туркманистон таъкид кард, ки минтақаи Осиёи Марказӣ асосан аграрӣ буда, дар он захираҳои фаровони озуқаворӣ мавҷуданд. Масъалаҳои рушди соҳаи кишоварзиро дар минтақа танҳо дар сатҳи миллӣ ҳал кардан мумкин нест. Бинобар ин кушодани Дафтари СММ имкон медиҳад, ки бисёр проблемаҳои мавҷуда бо кӯмаки созмонҳои байналхалқӣ ҳал карда шаванд, гуфт О.Атоева.                       Комиссияи рушди устувор дар назди Шӯрои иқтисодӣ ва иҷтимоии СММ фаъолият дорад. Намояндагони ҳамаи мамлакатҳои СММ узви комиссияи мазкур мебошанд.