НИНО БУРҶАНАДЗЕ СААКАШВИЛИРО БА СУД МЕДИҲАД

                       Тифлис, 20 май. (АМИТ «Ховар» — ИТАР — ТАСС ). — Раиси собиқи парлумони Гурҷистон Нино Бурҷанадзе, қарор дод, ки Президенти мамлакат Михаил Саакашвилиро ба суд диҳад. Н.Бурҷанадзе айни ҳол ба ҳизби мухолифи «Ҷунбиши демократӣ — Гурҷистони воҳид» роҳбарӣ мекунад.                        Н.Бурҷанадзе дар Тифлис зимни сӯҳбат бо хабарнигорон зикр намуд, ки М.Саакашвили дар изҳороти охирини худ кӯшиш менамояд, шаъну эътибор ва шӯҳрати сиёсии ӯро таҳқир намояд. Қайд карда шуд, ки агар мақомоти суди Гурҷистон аризаи шикоятии ӯро бо сабабҳои маълум қабул накунанд, вай ҳатман ба суди байналхалқии Страсбург шикоят хоҳад кард.                         Ба қавли раиси собиқи парлумон, Саакашвили вақтҳои охир чандин маротиба изҳор намудааст, ки фаъолияти сиёсии Бурҷанадзе аз Русия бо маблағ таъмин карда мешавад ва дар байни мухолифин шахсоне ҳастанд, ки ба манфиати яке аз мамлакатҳои бо Гурҷистон хусуматдошта кор мекунанд. Онҳо барои ин аз ин мамлакат маблағи зарурӣ мегиранд. Чунин даъвоҳо ягон асоси воқеӣ надоранд, гуфт Н.Бурҷанадзе. Намояндагони мақомоти дахлдори Гурҷистон ин суханони Бурҷанадзеро то ҳол шарҳ надодаанд.                      Н.Бурҷанадзе аз моҳи ноябри соли 2001 то моҳи майи соли 2008 раиси парлумони Гурҷистон буда, ду маротиба зимни истеъфои пеш аз мӯҳлати Э.Шеварднадзе ва М.Саакашвили вазифаи президентро иҷро кардааст. Ӯ аз моҳи ноябри соли 2008 роҳбари ҳизби мухолифи ҳукумат буда, дар мавриди истеъфои М.Саакашвили яке аз номзадҳои мансаби президентӣ мебошад.