НОМЗАДҲО БА МАҚОМИ ПРЕЗИДЕНТИ ЭРОН МУАЙЯН ШУДАНД

                        Душанбе, 22 май.(АМИТ «Ховар», Марзия Саидова).- Дар Ҷумҳурии Исломии Эрон 4 номзад ба мақоми Президенти ин кишвар муайян шуд. Онҳо Президенти феълии Эрон Маҳмуд Аҳмадинажод, собиқ сарвазири Эрон Мир Ҳусейн Мусавӣ, Раиси қаблии Маҷлиси Шӯрои исломии Эрон Маҳдӣ Каррубӣ ва собиқ фармондеҳи сипоҳи посдорони инқилоби исломӣ Мӯҳсин Ризоӣ мебошанд, ки аз ҷониби Шӯрои нигаҳбони Маҷлиси Шӯрои исломии Эрон — органи олии назорати конститутсионии ин кишвар тасдиқ гардидаанд.                          Назар ба иттилои намояндаи бахши матбуоти Сафорати Эрон дар Душанбе Алиризо Ороста, имрӯз Эронро фазои интихоботӣ фаро гирифтааст. Номзадҳои эълоншуда тавассути телевизион ва радиои давлатӣ таблиғоти пешазинтихоботӣ мебаранд. Ҳамзамон, ба минтақаҳои гуногуни мамлакат сафар карда, бо мардум вохӯрию мулоқот менамоянд. А. Ороста зикр кард, ки аз байни чор номзад Президенти кунунии Эрон Маҳмуд Аҳмадинажод ва Ҳусейн Мусавӣ имконоти бештари ба сари қудрат омаданро доранд. Дар интихоботи президентӣ дар Эрон, ки 12 июн баргузор мешавад, ҳудуди 30 миллион нафар райъдиҳандагон Президенти ояндаи ин кишварро интихоб менамоянд.