ОМОДАГӢ БА ҶАШНИ ВАҲДАТ СУРЪАТ МЕГИРАД

              Душанбе, 4 май. (АМИТ «Ховар», Бекназари Абӯбакр). — Дар яке аз иншооти ҷашнии вилояти Суғд — чойхонаи миллӣ дар Боғи Ваҳдат, ки ба муносибати 12-умин солгарди ҷашни Ваҳдати миллӣ дар кишвар бунёд мешавад, марҳилаи чўбкорӣ оғоз гардид.                Аз маркази иттилоот ва таҳлили дастгоҳи раиси вилояти Суғд ба АМИТ «Ховар» хабар доданд, ки ҳоло дар ин иншооти аҳамияти иҷтимоӣ-иқтисодӣ дошта, ки бояд рӯзи Ваҳдати миллӣ мавриди баҳрабардорӣ қарор гирад, корҳои сохтмонӣ босуръат идома дорад. Воқеан интихоби мавзеъ барои сохтмони чойхона хеле мувофиқ буда, он минбаъд бояд ба як макони фароғату истироҳати шаҳрвандон табдил ёбад. Чойхонаи нав, ки аз ҷониби Президенти мамлакат поягузорӣ шудааст, аз 3 толор -асосӣ, нақшбандишуда ва гаҷкоришуда иборат аст. Ҳоло дар ин иншоот беш аз 300 нафар устоҳои чирадасти чубкор ва наққошу кандакор, аз ҷумла 70 нафар занони ҳунарманд машғули кор ҳастанд. Дар ин чойхона 30 сутуни аз рўи анъанаҳои милливу қадимӣ кандакоришуда насб мешавад.