ОРМОНҲОИ МИЛЛИИ ТОҶИКОН ТАҶАССУМ ЁФТ

                      Душанбе, 15 май,(АМИТ «Ховар», Марзия Саидова).- Дар Теҳрон дар доираи баргузории 22-умин намоишгоҳи байналмилалии «Китоби Теҳрон» бо иштироки ҳайати баландпоя ва аҳли фарҳанги Тоҷикистон, намояндагони давлатҳои аъзои ЭКО Рӯзи миллии Тоҷикистон баргузор гардид.                     Сафири фавқулодда ва мухтори Ҷумҳурии Тоҷикистон дар Ҷумҳурии Исломии Эрон Рамазон Мирзоев доир ба муносибатҳои неку дӯстонаи Тоҷикистону Эрон сухан кард. Дипломати тоҷик ба сатҳи ҳамкориҳои гуногунсоҳаи ду кишвари ҳамзабон, хусусан робитаҳои фарҳангӣ баҳои баланд дода, онро самараи неки иродаи сиёсии сарони ҳар ду кишвар арзёбӣ намуд.                      Ҳамчунин, раисони Анҷуманҳои дӯстии Тоҷикистону Эрон Мирзо Муллоаҳмадов ва Шабистарӣ, раиси пажӯҳишгоҳи фарҳангии ЭКО Муҳаммад Раҷабӣ, шоири шинохтаи тоҷик Зиё Абдулло, директори китобхонаи миллии Тоҷикистон ба номи Абулқосим Фирдавсӣ Шариф Тошев ва дигар донишмандони тоҷик роҷеъ ба робитаҳои дӯстонаю бародарӣ, илмию фарҳангии ду кишвар, мақоми китоб дар ҳаёти инсоният, аҳамияти байналмилалии намоишгоҳи китоб ва тавсеаи ҳамкории гуногунсоҳаи кишварҳои аъзои ЭКО табодули назар карданд. Дар ин рӯз дастовардҳои илмию фарҳангии Тоҷикистон ба маърази тамошо гузошта шуда буд.                      Назар ба иттилои муҳаққиқи пажӯҳишгоҳи фарҳангии ЭКО Шоҳмансури Шоҳмирзо Рӯзи миллии Тоҷикистон дар сатҳи баланд баргузор гардида, таҷассумгари ормонҳои миллии тоҷикон буд.