РАИСИ КУМИТАИ ЗАМИНСОЗИИ ДУШАНБЕ АЗ ВАЗИФА САБУКДӮШ ШУД

                       Душанбе, 26 май.(АМИТ «Ховар», Марзия Саидова).- Раиси Кумитаи заминсозии шаҳри Душанбе А. Отабеков дар ҷаласаи Мақомоти иҷроияи маҳаллии ҳокимияти давлатӣ дар шаҳри Душанбе, ки таҳти раёсати Раиси шаҳри Душанбе Маҳмадсаид Убайдуллоев баргузор шуд, аз вазифа сабӯкдӯш гардид. Ҳамзамон бо сабаби нуқсонҳо дар фаъолияти корӣ ба муовини Раиси шаҳри Душанбе С. Раҳимова, сардори раёсати маорифи шаҳри Душанбе Ш. Исломов, раиси Кумитаи омори шаҳри Душанбе А. Насриддинов ва мудири шӯъбаи протоколӣ ва умумии дастгоҳи Раиси шаҳри Душанбе А. Шарипов танбеҳ эълон гардид.                        Тибқи иттилоъи котиби матбуотии Раиси шаҳри Душанбе Шавкат Саидов, сабаби аз вазифа сабукдӯш гардидан ва танбеҳ додан ба шахсони дар боло зикршуда ин бемасъулиятӣ ва вуҷуд доштани нуқсонҳо дар фаъолияти кори онҳо мебошад. Ҳамзамон, дар ҷаласа аз ҷониби Раиси шаҳр масъалаҳои муҳими хоҷагидорӣ ва омодагӣ ба маъракаи барӯйхатгирии аҳолӣ дар пойтахт дар асоси гузориши масъулини соҳа мавриди баррасӣ қарор дода шуд.                        Маҳмадсаид Убайдуллоев таваҷҷӯҳи муовинони Раиси шаҳр, раисони ноҳияҳо ва роҳбарони дигар субъектҳои хоҷагидори дахлдорро дар ин самт ба он нигаронид, ки иҷрои вазифаҳои таъинотиро дар мӯҳлати муқарраршуда таъмин сохта, ҳолати баррасии муроҷиатҳои шахсони ҳуқуқию воқеии унвонии шаҳрдорӣ ва ноҳияҳо воридшударо зери назорати қатъӣ қарор диҳанд.