РАИСИ ВИЛОЯТИ СУҒД ДОНИШҶӮЁНРО ДАР ДАСТГОҲАШ МЕОМӮЗАД

                     Душанбе, 13 май. (АМИТ «Ховар», Бекназари Абӯбакр). — 12 май раиси вилояти Суғд Қоҳир Расулзода бо иштирокчиёни Ҳафтаи худидоракунии ҷавонон дар вилояти Суғд мулоқот намуда, дар ҷараёни он изҳор дошт, ки ҳадаф аз ташкили Ҳафтаи худидоракунӣ ҷалби ҷавонон ба корҳои давлатӣ, баланд бардоштани самаранокии сиёсати давлат нисбат ба ҷавонон буда, барои аз наздик ошно кардани онон ба низоми давлатдорӣ мусоидат хоҳад намуд.                    «Дар вазифаи мухталифи давлатӣ фаъолият намуда, шумо — ҷавонон аз масъулияти роҳбарон огоҳӣ пайдо мекунед ва бовар дорам, ки таҷрибаи тӯли ин муддат ҳосил кардаатон дар оянда бароятон муфид хоҳад буд», — гуфт Қоҳир Расулзода.                  Аз маркази иттилоот ва таҳлили дастгоҳи раиси вилояти Суғд ба АМИТ «Ховар» иттилоъ доданд, ки баргузории Ҳафтаи худидоракунии ҷавонон тибқи қарори раиси вилоят «Дар бораи гузаронидани «Ҳафтаи худидоракунии ҷавонон» дар мақомоти иҷроияи ҳокимияти давлатии вилояти Суғд» аз 12 то 19 май сурат мегирад. Дар ин давра донишҷӯён дар раёсату шӯъбаҳои гуногуни мақомоти иҷроияи ҳокимияти давлатии вилояти Суғд фаъолият карда, бо тарзи ҷараёни кор дар ин мақоми давлатӣ ошно мегарданд.