СОХТМОНИ РОҲ ДАВОМ ДОРАД

                      Душанбе, 13 май. (АМИТ «Ховар», Кристина Эрлих). — Даври аввали сохтмони роҳи мошингарди «Душанбе — Хуҷанд — Бӯстон» тибқи нақша давом дорад ва он бояд охири моҳи июн ба истифода дода шавад. Барои тармиму таҷдиди роҳи мазкур 295 миллиону 900 ҳазор доллари ИМА ҷудо карда шудааст. Аз ин маблағ 281 миллиону 100 ҳазор долларро «Эксимбонк» — и Ҷумҳурии Мардумии Чин ва 14 миллиону 800 ҳазор доллари ИМА — ро Ҳукумати Тоҷикистон ҷудо кардаанд.                       Роҳи мазкур дар се давра тармим карда мешавад. Барои тармими он дар даври аввал 168 миллион ддоллари ИМА сарф карда мешавад. Давраҳои дуюму сеюми тармими роҳ бояд моҳи июли соли 2010 ба охир расонда шаванд. Комиссияи махсуси Тоҷикистону Чин сифати сохтмони роҳро дар давоми солҳои 2010 — 2011 ҳамаҷониба месанҷад. Айни ҳол нақшаи тармими роҳи мазкур иҷро карда мешавад. Мудири иҷроияи Маркази тармиму таҷдиди роҳ Қодир Саидов ба мухбири АМИТ «Ховар» гуфт, ки роҳи мошингарди «Душанбе — Хуҷанд — Бӯстон» моҳи сентябри соли 2011 дар арафаи таҷлили 20 — солагии истиқлолияти Ҷумҳурии Тоҷикистон пурра ба истифода дода хоҳад шуд.