СУҒД: САТРИ АВРАТ ҶИНОЯТИ КОЧОҚГАРРО ПӮШИДА НАТАВОНИСТ

                        Хуҷанд, 25 май. (АМИТ "Ховар", Санавбар Мақсудова). Ҳафтаи гузашта (санаи 21 майи соли 2009 тақрибан соати 06:35-и субҳ) ҳангоми гузаронидани чораҳои фаврӣ-ҷустуҷӯӣ дар чорчӯбаи амалиёти "Кӯкнор-2009"дар шоҳроҳи "Хуҷанд- Душанбе" аз тарафи кормандони Раёсати Агентии назорати маводи нашъаовари назди Президенти Ҷумҳурии Точикистон дар вилояти Суғд дар ҳудуди ағбаи Шаҳристон автомашинаи тамғаи Ҷип (Джипп) "Муссо" боздошта шуда, ба ҳудуди бинои Раёсат дастрас карда шуд. Ин автомашина ба истиқоматкунандаи шаҳри Истаравшан Рӯзибоев Парвиз, ки бо кашонидани мусофирони дурдаст машғул мебошад, тааллуқ дошт.                       Дар вақти аз назаргузаронии автомашинаи мазкур байни нонҳои дар багоҷ буда, борхалтаи селофании рангаш кабуд, ки дар дохилаш халтачаи маводи сафедчамонанди бӯи махсус дошта ҷойгир буд, дарёфт ва мусодира карда шуд.                         Маълум гашт, ки ин мавод ба мусофирзани автомашинаи мазкур М. тааллуқ дошта, аз рӯи маълумоти лабораторияи судӣ-ташхисии Раёсати АНМН вилояти Суғд маводи сахттаъсири героин буда, вазни он 2 килограмму 60 грамм будааст.                          Қочоқгар — тоҷикзани 26-сола М., борҳо бо ҷурми авбошӣ ва пинҳон доштани ҷиноёти вазнин маҳкумшуда буда, истиқоматкунандаи шаҳри Хуҷанд ва соҳиби як фарзанд будааст. Ин зани нашъаҷаллоб бо сатри аврат ҷинояткории хешро пинҳон намуда, аз интиқоли ғайриқонунии маводи мухаддир соҳиби маблағҳои калон шудан мехост. Бинобар ин аввал аз ҷануби кишвар ба шимоли он, ва минбаъд ба дигар давлатҳои Иттиҳоди давлатҳои муштаракулманофеъ маводи мухадирро бо роҳи қочоқ бурданӣ буд. Аммо амалиёти самараноки кормандони оперативии Раёсати Агентӣ ҳадафҳои ғаразноки ин зани ҷинояткорро шикаст дод.                           Амалиёти "Кӯкнор-2009" дар қаламрави вилоят 10 маи соли равон оғоз ёфта, то 30 ноябри ҳамин сол давом хоҳад кард. Дар он ҳамчунин кормандони дигар мақомотҳои ҳифзи ҳуқуқ, сохторҳои ҳифзи муҳити зист, тандурустӣ ва ғайра иштирок доранд.