СУДИ КОНСТИТУТСИОНӢ ПАРВАНДАИ «АЙРЕНГЕН- ЛТД»-РО БАРРАСӢ НАМУД

                      Душанбе, 13май апрел. (АМИТ «Ховар», Анварбек Сиддиқов).- Суди конститутсионии Ҷумҳурии Тоҷикистон 13 майи соли ҷорӣ дар толори маҷлисгоҳи худ муроҷиати намояндаи ваколатдори Ширкати байналхалқии тиҷоратии «Айренген- ЛТД»-ро мавриди барасӣ қарор дод. Дар он намояндагони воколатдори Дастгоҳи иҷроияи Президенти Ҷумҳурии Тоҷикистон, Маҷлиси намояндагон ва Маҷлиси миллии Маҷлиси Олии Ҷумҳурии Тоҷикистон, Прокуратураи генералӣ ва Суди олии иқтисодии кишвар иштирок намуданд.                      Намояндаи ваколатдори Ширкати «Айренген- ЛТД» дар бораи муайян намудани мутобиқати қисми 3 моддаи 270 Кодекси Ҷумҳурии Тоҷикистон, дар бораи мурофиаи судии иқтисодӣ ба қисми 1 моддаи 1, қисми 2 моддаи 5, қисми 3 моддаи 14, қисми 1 моддаи 17, қисми 1 моддаи 19 ва қисми 2 моддаи 88 Конститутсияи Ҷумҳурии Тоҷикистон талош варзид.                    Суди Конститутсиони баъди муҳокимаи масъалаи мазкур, баҳсу андешаҳои тарафҳо ва иштирокчиёни мурофиаро ба инобат гирифта, мӯҳлати 6- моҳаи ариза ё эътироз дар бораи аз нав дида баромадани санади судӣ ба тариқи назоратиро ба талаботи моддаҳои зикршудаи Конститутсияи Ҷумҳурии Тоҷикистон мутобиқ арзёбӣ намуд.                 Қайд гардид, ки мӯҳлати муроҷиати мурофиавӣ аз тарафи қонунгузорӣ муайян шуда, барои ҳифзи ҳуқуқи манфиатҳои халалдоршуда, мӯътадилии муносибатҳои ҳуқуқӣ дар ҷомеа, мустаҳкам кардани асосҳои иқтисодию иҷтимоӣ, интизомию иҷроиявии субъектҳои ҳуқуқ ва таъмини фаъолияти самараноки мақомоти судӣ оид ба ҳифзи ҳуқуқу манфиатҳои поймолшудаи шахсони воқеӣ ва ҳуқуқӣ равона карда шудааст.