ТАҶЛИЛИ 50 — СОЛАГИИ ТЕЛЕВИЗИОНИ ТОҶИКИСТОН

                          Душанбе, 27 май. (АМИТ «Ховар», Таҳмина Ғоибназарова). — 3 октябри соли равон 50 — солагии таъсиси телевизиони Тоҷикистон ҷашн гирифта мешавад. Муовини аввали раиси Кумитаи телевизион ва радиои ҷумҳурӣ Абдураҳмон Абдуманнонов ба АМИТ «Ховар» хабар дод, ки барои омодагӣ ба ҷашн гурӯҳи махсуси корӣ ташкил дода шуд. Ҳамаи тадбирҳои идона дар давоми як рӯз гузаронида мешаванд, гуфт А.Абдуманнонов. Нимаи аввали рӯзи 3 октябр дар мавзӯи «Нақши воситаҳои ахбори оммавии электронӣ дар ҷараёни демократӣ сохтани ҷомеа» нишасти байналмилалии матбуотӣ гузаронида мешавад. Дар он ҳамаи студияҳои телевизионии мамлакатҳои ИДМ ширкат меварзанд. Нишасти матбуотии мазкур ба барномаи Кумитаи иҷроияи ИДМ дохил карда шуд. Ҳамон рӯз баъди чошт бахшида ба 50 — солагии таъсиси телевизиони Тоҷикистон консерти идона ва мулоқотҳои эҷодӣ гузаронида мешаванд. Ба ин муносибат нашри маълумотнома дар бораи таърихи телевизион пешбинӣ карда мешавад, гуфт А.Абдуманнонов.