ТОҶИКИСТОН ДАР ИДОРАИ САРҲАДОТИ МИНТАҚА НАҚШИ МУҲИМ МЕБОЗАД

                        Душанбе, 27 май. (АМИТ «Ховар», Фарангис Раҳимова). — Президенти Ҷумҳурии Тоҷикистон Эмомалӣ Раҳмон баъди чошти 26 май бо сафирони мамлакатҳои аъзои Созмони амнияту ҳамкории Аврупо мулоқот кард. Баъди он мулоқоти сафирон бо хабарнигорон баргузор гардид. Дар он сафири Юнон Мара Маринаке изҳор намуд, ки зимни сӯҳбат бо Президенти Ҷумҳурии Тогҷикистон бисёр мавзӯъҳо муҳокима карда шуданд. Мо аз ҷумла, проблемаҳоеро мавриди баррасӣ қарор додем, ки Созмони амнияту ҳамкории Аврупо барои ҳалли онҳо кӯмак расонда метавонад, гуфт вай.                       Ба ақидаи мо, Тоҷикистон дар тақвияти муҳофизат ва идораи сарҳадҳои минтақаи Осиёи Марказӣ нақши муҳим мебозад. Бинобар ин Тоҷикистонро дар ин масъала ҳамаҷониба дастгирӣ кардан лозим аст. Президент Эмомалӣ Раҳмон ба ҳамкории Тоҷикистон бо САҲА баҳои мусбат дод. Ба ақидаи мо, нақшаҳо ва барномаҳои муштараки Тоҷикистон ва САҲА бомуваффақият иҷро карда мешаванд. Мо ҳамкориро бо Тоҷикистон давом дода, барномаҳои сершумори дигарро дар ин мамлакат амалӣ хоҳем кард, гуфт дар хотима Мара Маринаке.                      Мухбири АМИТ «Ховар» хабар медиҳад, ки раёсати Созмони амнияту ҳамкории Аврупо айни ҳол ба зиммаи Юнон гузошта шудааст.