ТОЛИБИЛМОНИ ДУШАНБЕ БА ИСТИРОҲАТГОҲҲО ФАРО ГИРИФТА МЕШАВАНД

                      Душанбе, 22 май.(АМИТ «Ховар», Марзия Саидова).-1600 нафар наврасони Душанбе дар соли равон дар истироҳатгоҳҳои берунишаҳрии «Зимчуруд», «Шарора», «Гулханӣ» ва «Орзу» ба истироҳат фаро гирифта мешаванд. Дар ин хусус, Раиси шаҳри Душанбе Маҳмадсаид Убайдуллоев қарор ба имзо расонд. Тибқи он истироҳатгоҳҳои дар боло зикршуда, ки дар тавозуни чор ноҳияи пойтахт аст, то 28 май пурра аз таъмиру тармим бароварда мешаванд.                       Бояд тазаккур дод, ки аз 1600 нафар толибилмоне , ки дар истироҳатгоҳҳои тобистона фаро гирифта мешаванд, 160 нафарашон тарбиятгирандагони мактаб-интернатҳои пойтахт мебошанд. Талабагон дар ду баст -аз 10 то 30 июн ва басти дуюм аз 6 то 26 июл дар истироҳатгоҳҳои берунишаҳрӣ истироҳат менамоянд.