ВОРИДОТИ МАБЛАҒ БА БУҶА ДАР СЕМОҲАИ СОЛИ 2009 ИҶРО НАШУД

              Душанбе, 6 май. (АМИТ «Ховар», Лаззат Диловарзод).- Раиси Кумитаи андози назди Ҳукумати ҷумҳурӣ аз он изҳори нигаронӣ дорад, ки андозсупорандагон вазифаи худро дар семоҳаи аввали соли 2009 ба андозаи 9,1 млн. сомонӣ иҷро накарданд.             Корхонаҳои ғайрибуҷетӣ дар ин муддат нақшаи андозсупории худро 100,2 фоиз иҷро намуданд, ки он аз нақшаи пешбинишуда 164,3 ҳазор сомонӣ зиёд аст.            Ташкилотҳои буҷетӣ бошанд нақшаи воридоти маблағро ба буҷа ҳамагӣ 82,3 фоиз иҷро намуданд, ки аз он 7,9 млн. сомонӣ камтар ба буҷети ҳифзи иҷтимоии аҳолӣ ва нафақа маблағ ворид гардидааст.             Аз бақияи қарзи андоз ва пардохтҳо ҳамагӣ 563,8 млн. сомонӣ ба буҷа ворид шудааст.             Ҳаҷми бақияи қарз дар вилояти Хатлон 139,3 млн. сомонӣ ва дар вилояти Суғд 113,6 млн. сомониро ташкил медиҳад.