ҚАБУЛИ ҚОНУНҲО БАРОИ РУШДИ СОҲИБКОРӢ МУСОИДАТ МЕКУНАД

                  Душанбе, 11 июн.(АМИТ «Ховар», Лаззат Диловарзод).- Ҷумҳурии Тоҷикистон чун давлати демократӣ баҳри дастгирии соҳибкорӣ ва рушди бемайлони муносибатҳои бозорӣ як силсила санадҳои меъёрии ҳуқуқиро қабул намудааст.                 Аз ҷумла, қонунҳо «Дар бораи ҳимоя, дастгирии давлатии соҳибкорӣ дар Ҷумҳурии Тоҷикистон», «Дар бораи сармоягузорӣ», «Дар бораи санҷиши фаъолияти субъектҳои хоҷагидорӣ дар Ҷумҳурии Тоҷикистон», «Дар бораи минтақаҳои озоди иқтисодӣ», «Дар бораи бақайдгирии давлатии шахси ҳуқуқӣ», «Дар бораи авфи шаҳрвандон ва шахсои ҳуқуқии Ҷумҳурии Тоҷикистон бинобар қонунигардонии молу мулк» қабул карда шудааст,- иброз доштанд дар Раёсати таъминоти ҳуқуқии Вазорати адлияи Ҷумҳурии Тоҷикистон ба мухбири АМИТ «Ховар».                  Қабули санадҳои зикршуда асоси ҳуқуқии рушди соҳибкории хурду миёна ва густариши ҷалби сармояро дар Ҷумҳурии Тоҷикистон таъмин менамояд.