ҲУКУМАТ НИСБАТ БА БОЛОРАВИИ НАРХҲО ЧОРА МЕАНДЕШАД

                          Душанбе, 1 июн. (АМИТ «Ховар», Бекназари Абӯбакр). — Вазорати рушди иқтисод ва савдои ҷумҳурӣ бо назардошти болоравии қурби номиналии асъор ва бо мақсади омӯзиши ташаккулёбии нархҳои фурӯши маҳсулоти аввалиндараҷаи истеъмолӣ, бахусус орд, гандум, шакар ва маводи сӯхт — бензину сӯзишвории дизелӣ, мутобиқи моддаи 14 Қонуни ҶТ «Дар бораи рақобат ва маҳдудкунии фаъолияти инҳисоротӣ дар бозорҳои мол» аз 1 июн фармоиши махсус ба тасвиб расонид.                          Мудири котиботи Вазорати рушди иқтисод ва савдои ҶТ Анвар Латифов ҳадафи фармоиши мазкурро шарҳ дода, тазаккур дод, ки тибқи ин фармоиш аз ҳисоби мутахассисони вазорат гурӯҳи махсуси корӣ таъсис дода шудааст, ки он дар давоми моҳи июн мониторинги маҳсулоти зикршударо дар қаламрави ҷумҳурӣ гузаронида, аз натиҷаҳои он оид ба сабабҳои болоравии беасоси нарҳҳо хулосаҳояшро ба Ҳукумати мамлакат пешниҳод менамоянд. Аз рӯи натиҷаҳои хулосаи гурӯҳи кории вазорат нисбат ба болоравии нархҳо дар бозори истеъмолӣ Ҳукумат чораҳои мушаххас меандешад.