АНҶУМАНИ ДУЮМИ ДУХТУРОНИ ДАНДОНИ ТОҶИКИСТОН

                           Душанбе, 1 июн. (АМИТ «Ховар», Кристина Эрлих).- Рӯзҳои 8 ва 9 июн дар Кохи Ваҳдат анҷумани дуюми духтурони дандони Тоҷикистон баргузор мегардад.Бахшида ба анҷуман дар даромадгоҳи Кохи Ваҳдат намоишгоҳи байналмиллалии махсусгардондашудаи дастовардҳои соҳаи табобати бемориҳои дандону даҳон ташкил карда мешавад. Дар он корхонаҳои маҳаллию хориҷӣ ширкат меварзанд.                             Дар ҷараёни анҷуман чор маҳфили такмили маҳорат бахшида ба барқарор сохтани дандонҳо, истифодаи фулузот ва сафол барои сохтани дандонҳои сунъӣ, роҳу усулҳои самарабахши табобати дандонҳо, иваз кардани онҳо ва ғайра гузаронида мешавад.  Ин маҳфилҳо таҳти роҳбарии мутахассисони мамлакатҳои хориҷӣ баргузор мегарданд.Анҷуман бо кӯмаки Ҷамъияти духтурони дандони мамлакат, Вазорати тандурустӣ ва Ҳукумати ҷумҳурӣ гузаронида мешавад.                             Дар он бештар аз 500 вакил, инчунин олимону мутахассисон аз Италия, Олмон, Лаҳистон, Украина, Русия ва мамлкатҳои дигари ИДМ иштирок хоҳанд кард.