БАРРАСИИ МАСЪАЛАИ ОСОНТАР СОХТАНИ УБУРУ МУБУРИ САРҲАДҲО ДАР МИНТАҚАИ СҲШ

                  Маскав, 6 июн. (АМИТ «Ховар», Ҳалима Хушқадамова).- Дар Академияи хизмати давлатии назди Президенти Русия дар мавзӯи «Ҳамкории мамлакатҳои аъзои СҲШ дар соҳаи нақлиёт бо мақсади вусъат додани ҳамлу нақли байналхалқии мол ва осонтар сохтани убуру мубури сарҳад дар минтақа» машварат баргузор гардид. Иштирокчиёни машварат вазифаҳои аввалиндараҷаи Созмони ҳамкории Шанхайро дар масъалаи бунёди низоми умумӣ ва бехатари нақлиётӣ дар минтақа, проблемаҳои муқаррар намудан ва вусъат додани шабакаҳои асосии автомобилӣ ва роҳи оҳан дар мамлакатҳои аъзои созмон ва ғайраро муҳокима карданд.                  Мухбири АМИТ «Ховар» хабар медиҳад, ки аз Тоҷикистон дар ин машварат коршиноси котиботи СҲШ Г. Умаралиев ва раиси Шӯрои байниҳукуматии муассисаҳои ҳифзу муроқибати роҳҳо Б. Каримов иштирок намуданд. Машварат бо ташаббуси Вазорати нақлиёти Федератсияи Русия баргузор гардид.