БОРИШИ БОРОН ДУ РЎЗ ДАВОМ МЕКУНАД

                         Душанбе 1 июн. (АМИТ «Ховар», Лутфия Эшонқулова).- Бориши борон ва раъду барқ дар саросари ҷумҳурӣ то 3 июн давом мекунад. Ҳавосанҷҳо пешгӯӣ менамоянд, ки 4 июн дар мамлакат ҳаво софу беғубор ва беабр хоҳад шуд. Тӯли ин рӯзҳо ҳарорати ҳаво дар водиҳо аз 22 то 27 дараҷа ва дар қисмати ҷанубии мамлакат то 30 дараҷа гарм мешавад. Рӯзҳои 5 ва 6 июн боридани боронҳои кӯтоҳмуддат имконпазир мебошад.                        Сардори Агентии ҳавосанҷии ҷумҳурӣ Ҷамила Байдуллоева ба мухбири АМИТ «Ховар» гуфт, ки умуман ҳавои моҳи июн нисбатан гарм буда, ҳарорати он дар ҳадди эътидол мебошад.                        Ёдовар мешавем, ки ҳаҷми бориши борон моҳи апрел ва аввали моҳи май дар қисмати зиёди қаламрави Тоҷикистон аз меъёри муқаррарӣ 1-1,5 баробар зиёд буд.