ЧИПТАИ КОНСЕРТИ МУИН ЧАНД СОМОНӢ АСТ?

                 Душанбе, 15 июн.(АМИТ «Ховар», Марзия Саидова).-Нархи чиптаи консерти сарояндаи машҳури Шарқ — Муин чанд сомонӣ аст? Бо ин ва дигар саволҳо хабарнигори АМИТ «Ховар» ба директори Маҷмааи давлатии «Кохи Борбад»-и пойтахт Абдураҳмон Ҳалимов муроҷиат кард. Мавсуф дар посух гуфт, ки нархи чиптаҳо барои консерти ҳунарманди шинохтаи эронӣ — Муин аз ҷониби сарпарастоне, ки Муинро бо сафари ҳунарӣ ба Тоҷикистон даъват намудаанд, муайян карда шудааст ва он тавассути кассаҳои «Кохи Борбад» фурӯхта мешаванд. Нархи чипта барои қатори 1-ум то 18-ум 200-сомонӣ, барои ду қисмати қаторҳои зикршуда 150 сомонӣ ва аз қатори 18 то қатори охирин 100 сомониро ташкил медиҳад. «Кохи Борбад» дорои 1917 ҷойи нишаст буда, шахсоне, ки дар он консерт баргузор менамоянд бо гирифтани иҷозатномаи Дастгоҳи иҷроияи Президенти ҷумҳурӣ бояд 20 ҳазор сомонӣ ба буҷаи Кох супоранд. Назар ба иттилои Абдураҳмон Ҳалимов алҳол тамоми чиптаҳои рӯзи аввали консерт фурӯхта шудаанд.                  Бояд тазаккур дод, ки консерти ҳунарманди шинохати эронӣ -Муин, ки дар байни мардуми тоҷик маҳубубияти бузург дорад, рӯзҳои 20-21-уми июни соли равон таҳти унвони «Ин чӣ ишқест…» дар Маҷмааи давлатии «Кохи Борбад»-и Душанбе баргузор мегардад. Сафари нахустини ҳунарии сарояндаи маъруф Муин ба Тоҷикистон бо ибтикори соҳибкори инфиродӣ Марҳабо Азизова сурат гирифта, сарпарасти консерт ширкати алоқаи мобилии «Индиго Тоҷикистон» ва сарпарасти иттилоотии он радиои «Имрӯз» аст.