ДАР ҶАҲОН ТЕЪДОДИ ЗИЁДИ БАЧАГОН БАРОИ ИҶРОИ КОРҲОИ ВАЗНИН ИСТИФОДА МЕШАВАНД

                  Душанбе, 13 июн. (АМИТ «Ховар», Фарангис Рахимова).- Созмони байналхалқии меҳнат ба муносибати Рӯзи ҷаҳонии пешгирии меҳнати вазнини бачагон маърӯза интишор дод. Дар он гуфта мешавад, ки имрӯз дар мамлакатҳои ҷаҳон зиёда аз 100 миллион духтари хурдсол барои иҷрои корҳои вазнин истифода бурда мешавад. Духтаронро калонсолон, аз ҷумла ҷинояткорон барои ба даст овардани маблағ ва ҳадафҳои дигари худ мехаранду мефурӯшанд.                 Дар маърӯза омадааст, ки бачагони хурдсол корҳои вазнинро иҷро карда, ба маҳрумиятҳои гуногун дучор мегарданд. Бо ҳамин сабаб онҳо аз таҳсил маҳрум мегарданд. Корҳои вазнин ба саломатии бачагон низ таъсири манфӣ мерасонад. Имрӯз дар ҷаҳон бештар аз 250 миллион писару духтари хурдсол ба иҷрои корҳои вазнин маҷбур карда мешавад. Онҳо дар корхонаҳои саноатӣ, конҳо, фермаҳо ва киштзор кор мекунанд. Як қисми бачагон дар ҷараёни муноқишаҳои мусаллаҳона ҳамчун аскар истифода бурда мешаванд.                 Созмони байналхалқии меҳнат бо вуҷуди мамлакатҳои ҷаҳонро фаро гирифтани бӯҳрони шадиди молиявӣ кӯшиш ба харҷ медиҳад, ки ҳуқуқи бачагон дар ҳама ҷо ҳифз карда шавад.