ДОНИШҶӮЁНИ ТОҶИК АЗ МИСР ХОРИҶ КАРДА МЕШАВАНД

                    Душанбе, 6 июн. (АМИТ «Ховар», Наргис Бояхмедова).- Мақомоти муҳофизи қонуни Миср дар бораи аз мамлакат рондани 5 донишҷӯи Тоҷикистон қарор қабул намуданд. Аз ҷумла донишҷӯёни тоҷик Шавкат Кимсанов ва Хуршед Эрматов, ки сокинони ноҳияи Турсунзода мебошанд, ба рафтору ахлоқи ғайридинӣ гунаҳкор карда мешаванд. Фаридун Гулов, Идибек Зиёвиддин ва Аъламшо Шарифов барои риоя накардани қоидаҳои буду бош дар Миср аз ин мамлакат ронда хоҳанд шуд.                   Ҳамаи донишҷӯёни зикршуда дар консулхонаи Тоҷикистон дар Миср ба қайд гирифта нашудаанд. Хабар дода мешавад, ки мақомоти амниятии Миср шаби 28 май дар маҳалли истиқомати донишҷӯёни хориҷӣ тафтиш гузаронида, шумораи хеле зиёди шаҳрвандони ИДМ, аз ҷумла 15 шаҳрванди Тоҷикистонро дастгир карда буданд. Қисми зиёди онҳо донишҷӯ буда, асосан дар Донишгоҳи Алазҳор таҳсил мекунанд.                   Кормандони сафоратхонаи Тоҷикистон дар Ҷумҳурии Араби Миср аз рӯзҳои аввали дастгир шудани донишҷӯён бо мақомоти дахлдори Қоҳира ҳамеша дар тамос буданд. Рӯзи якум шаш нафар ва рӯзи дигар чор нафар шаҳрванди Тоҷикистон аз ҳабсхона ҷавоб дода шуданд. Бояд гуфт, ки ҳамаи донишҷӯёни дастгиршуда аз ҳисоби худ барои таҳсил ба Миср рафтаанд.                   Мақомоти муҳофизи қонуни Миср аз сафоратхонаи Тоҷикистон хоҳиш карданд, ки барои ба ватан фиристодани шахсони дастгиршуда кӯмак расонанд. Сафоратхонаи Тоҷикистон изҳор намуд, ки дар мавриди пардохтани хароҷоти роҳи донишҷӯён аз ҳисоби падару модаронашон тайёр аст, масъалаҳои дигари марбут ба фиристодани онҳоро ба ватан ҳал кунад.