ФЕСТИВАЛИ ЭҶОДИЁТИ МУСИҚӢ ВА ҲУНАРИИ НАВРАСОН «ОФТОБАК»

                        Душанбе, 1 июн. (АМИТ «Ховар», Фарангис Рахимова). — 1 июн бахшида ба Рӯзи байналмилалии ҳифзи кӯдакон, дар Хуҷанд, Фестивали умумишаҳрии «Офтобак» баргузор мегардад.                         Чорабинии мазкур аз тарафи Мақомоти ҳокимияти давлатии иҷроия ва мактаби мусиқии №2 ш. Хуҷанд бо дастгирии молиявии Барномаи «Фарҳанг ва ҳунар»-и Шӯъбаи Ташкилоти байналмилалии Институти «Ҷамъияти Кушода» Бунёди Мадад дар Тоҷикистон гузаронида мешавад.                          Тавре ба АМИТ «Ховар» аз Институти «Ҷамъияти Кушода» Бунёди Мадад дар Тоҷикистон хабар доданд, мақсади асосии Фестивали «Офтобак» муаррифии гурӯҳҳои эҷодии кўдаконаи Хуҷанд: ансамблҳои фортепианӣ, ансамбли ксилофонистҳо, скрипканавозон, оркестри нафасӣ, хори кўдакон, гурўҳи рақсӣ ва бо ҳамин восита ҷалб намудани диққати аҳли ҷомеа ба тарбияи бадеии насли наврас мебошад.                          Фестивали «Офтобак» бо иштироки мактабҳои мусиқӣ бори нахуст гузаронида мешавад. Муаррифии гурӯҳҳои эҷодии кӯдаконаи тамоюли аврупоӣ дар Рӯзи байналмилалии ҳифзи кӯдакон имконият медиҳад, ки на фақат анъанаҳои гумшударо барқарор намояд, балки аҳолиро бо анъанаҳои эҳёшудаистодаи аврупоии санъати мусиқӣ ва эҷодиёти бадеӣ шинос кунад. Ин иқдом ба тарбияи эстетикӣ ва ташаккули шахсияти кӯдакон мусоидат менамояд.                       Дар доираи фестивал инчунин бозиҳои варзишӣ, байтбарак, намоиши эҷодиёти кӯдакон, расмкашӣ дар рӯи мумфарш, намоишҳои театри лӯхтак гузаронида мешаванд