ИШТИРОКИ Ҳ. ЗАРИФИ ДАР МУЛОҚОТИ ҒАЙРИРАСМИИ «ГУРӮҲИ ҲАШТГОНА»

                  Душанбе, 30 июн. (АМИТ «Ховар», Наргис Бойаҳмадова). — 26 июни соли ҷорӣ дар шаҳри Триестаи Италия вазири корҳои хориҷии Ҷумҳурии Тоҷикистон Ҳамрохон Зарифӣ дар кори мулоқоти ғайрирасмии вазирони корҳои хориҷии ҳашт давлати пешрафтаи саноатии ҷаҳон (Гурӯҳи 8) оид ба Афғонистон ва андозагирии минтақавӣ иштирок кард.                   Дар мулоқот вазирони корҳои хориҷии «Гурӯҳи ҳаштгона», Афғонистон, кишварҳои Осиёи Марказӣ, кишварҳои мададгор, инчунин роҳбарони баъзе созмонҳои байналмилалӣ, Дабири Кулли СММ, ЮНОДС, Созмони байналмилалии муҳоҷират ва дигарон иштирок варзиданд.                  Ҷонибҳо масъалаҳои ҳамкориро дар идораи сарҳадот ва ҳамдастиҳои ҷомеаи ҷаҳонӣ дар мубориза бо гардиши ғайриқонунии маводи нашъадор баррасӣ карданд. Вазири корҳои хориҷии Ҷумҳурии Тоҷикистон Ҳамрохон Зарифӣ суханронӣ намуда,қайд кард ки «имрӯз истеҳсол ва гардиши ғайриқонунии маводи нашъаовар аз Афғонистон ба кишварҳои ҳамсояи он ва Аврупо ба сифати яке аз омилҳои халалдор кардани вазъият дар минтақа ва ҷаҳон баррасӣ карда мешавад. Сарфи назар аз кӯшишҳои ҷомеаи ҷаҳонӣ, мутаасифона, мубориза бо ин хатар характери давомдор гирифтааст.                   Тоҷикистон ҷонибдори қабули усулҳои нисбатан самараноки ҳамкорӣ ва воситаҳост, ки баҳри бартараф намудани хатару таҳдидҳои мушаххас равона гардидаанд». Зарур аст, ки ҳалли бунёдии мушкилоти иҷтимою-иқтисодӣ ва экологӣ таъмин гардида, баҳри болоравии некӯаҳволии мардум шароит фароҳам оварда шавад.                   Якум, таҳия ва амалӣ намудани барномаи кишти зироатҳои алтернативӣ тавассути фароҳам овардани шароит барои барқарор сохтан ва беҳсозии низоми обёрии Афғонистон дар решакан кардани парвариши афюн омили муҳиме буда метавонад. Инро тавассути сохтмони сарбандҳо ва нерӯгоҳҳои обии барқӣ дар дарёи сарҳадии Панҷ амалӣ кардан мумкин аст.                 Дуюм, бо таҳдиди маводи нашъадор на танҳо дар кишваре, ки он истеҳсол шудааст, балки дар он кишварҳое низ мубориза бурдан лозим, ки истеъмол мешавад. Маълум аст, ки аз думболи маҳдуд гардидани истеъмол истеҳсоли он низ кам хоҳад шуд. Сеюм, масъалае, ки ба он бояд ҷомеаи ҷаҳонӣ аҳамияти ҷиддӣ диҳад, барҳам задании воридоти моддаҳои химиявӣ ва ашёи хом барои истаҳсоли нашъа аз хориҷа ба Афғонистон аст, ки дар ин кишвар истеҳсол намешаванд.                 Ҳ.Зарифӣ инчунин пешниҳод намуд, ки иттиҳоди васеи зидди маводи нашъадор таъсис дода шавад.