КИШОВАРЗОН КАЙ ИДИ ХУДРО ТАҶЛИЛ МЕНАМОЯНД?

                 Душанбе, 10 июн.(АМИТ «Ховар», Марзия Саидова).-Минбаъд ҳар сол 8 октябр дар Тоҷикистон Рӯзи кишоварзон таҷлил мегардад. Ин сана тибқи ворид намудани тағйиру илова ба Қонуни Ҷумҳурии Тоҷикистон «Дар бораи рӯзҳои ид» дар ҷумҳурӣ, ки 10 июн дар ҷаласаи навбатии иҷлосияи 5-уми Маҷлиси намояндагон баррасӣ гардид, муайян шуд.                Зимни баррасии масъалаи мазкур узви Кумитаи Маҷлиси намояндагон Зулфия Узоқова гуфт, ки мақсади ворид намудани тағйиру иловаҳо ба Қонуни мазкур ин дигар гардидани сохтори Вазорати кишоварзӣ аст. Зеро қаблан корхонаҳои саноатии коркарди маҳсулоти кишоварзӣ тобеи Вазорати кишоварзӣ буданд ва аз соли 2008 онҳо тобеи Вазорати энергетика ва саноати ҷумҳурӣ гардиданд.                  Ҳамзамон, Зулфия Узоқова афзуд, ки маъракаи ҷамъоварии ҳосили зироатҳои кишоварзӣ асосан дар моҳи октябр сурат мегирад. Аз ин рӯ таҷлил намудани иди кишоварзон дар ин давра мувофиқи мақсад аст.