КОМЁБИИ ТАЭКВОНДОЧИЁНИ ТОҶИК ДАР ТОШКАНД

                          Душанбе, 2 июн. (АМИТ «Ховар», Пайрав Назаров).-Аз 28 то 31 май дар шаҳри Тошканд Мусобиқоти қаҳрамонии мамлакатҳои Осиёи Марказӣ аз рӯи намуди варзиши таэквондо баргузор гардид, ки дар он варзишгарони тоҷик 15 медал ба даст оварданд.                          Аз дафтари матбуотии Кумитаи Миллии Олимпии Тоҷикистон (КМО ҶТ), ба мухбири АМИТ «Ховар» хабар доданд, ки дар ин мусобиқа таэквондочиёни мо соҳиби 7 медали тилло, 4 медали нуқра ва 4 медали биринҷӣ гардиданд.                          Дар ин мусобиқа — Насхиддин Ворисов, Хисрав Ғиёсов, Алишер Гулов, Сунатулло Шеров, Дилшод Зайдуллоев, Шукрона Шарифова ва Сергей Ли медали тилло гирифтанд. Бо медали нуқра — Хоҷаева Тахмина, Адолат Сафарова, Гулчеҳра Раҳимова ва Тошматов Сафарбек сарфароз шуданд. Медалҳои биринҷии мусобиқа насиби — Нодирҷон Амиров, Илҳом Неъматуллоев, Неъмат Маҳмадҷонов ва Диловар Зайниддинов гардид.                        Сармураббии дастаи мунтахаби таэквондочиёни Тоҷикистон Исматулло Хоҷаев қайд намуд, ки «ин мусобиқа бо қоидаҳои нав гузаронида шуда, аввалин маротиба 30 варзишгари тоҷик дар он иштирок кард».