КЎМАКИ НАВБАТИИ ХАЙРИЯИ РУСИЯ БА ТОҶИКИСТОН

                  Душанбе, 11 июн. (АМИТ «Ховар», Жасмин Назарова).-Дирӯз боз як ҳавопаймои боркаши Вазорати вазъияти фавқулоддаи Федератсияи Русия ба Тоҷикистон миқдори зиёди кӯмаки хайрия овард. Кӯмаки хайрия барои онҳое пешбинӣ шудааст, ки охири моҳи апрел ва аввали моҳи майи соли равон бар асари боришоти тӯлонӣ зарар дидаанд. Мухбири АМИТ «Ховар» хабар медиҳад, ки кӯмаки нахустини хайрияи Русия 9 июн ба Душанбе оварда шуд. Маблағи умумии кӯмаки нахустини хайрия қариб 21 миллион рубли Русия мебошад.                 10 июн ба Тоҷикистон боз бештар аз 10 тонна консерваи гӯштӣ, 70 хаймаи «Помир-30», 4 нерӯгоҳи хурди барқии сайёр, қариб 2,5 ҳазор метри мураббаъ шиша ва 2,5 ҳазор кампал фиристода шуд. Дар маросими супоридани кӯмаки хайрия сафири Русия дар Тоҷикистон Ю. Попов, муовини аввали директори Агентии захираҳои давлатии молиявии назди Ҳукумати ҷумҳурӣ С. Зиёдуллоев ва муовини раиси Кумитаи ҳолатҳои фавқулъодда ва мудофиаи шаҳрвандии мамлакат Р. Шоев иштирок доштанд.