МАҶЛИСИ ФАЪОЛОНИ ВИЛОЯТИ СУҒД

                   Хуҷанд, 10 июн. (АМИТ «Ховар», Санавбар Мақсудова).- Дирӯз дар шаҳри Хуҷанд таҳти раёсати раиси вилояти Суғд Қоҳир Расулзода маҷлиси фаъолони вилоят баргузор гардид. Дар он натиҷаҳои тараққиёти иҷтимоию иқтисодии вилоят дар давоми 5 моҳи гузашта ҷамъбаст карда шуданд. Зикр шуд, ки дар ин муддат нақшаи қисмати даромади буҷет 104 % ва қисмати хароҷоти он 95,7% иҷро шуд.                  Дар давоми 5 моҳи гузашта дар вилоят нақшаи истеҳсоли маҳсулоти саноат 100,8 % ба иҷро расид. Маблағи хариду фурӯши мол бо мамлакатҳои хориҷӣ 304,1 миллион доллари ИМА ва маблағи воридоти мол аз хориҷи кишвар 250 миллион доллари ИМА-ро ташкил дод. Ин нисабт ба ҳамин давраи соли гузашта 15 миллион доллар зиёд мебошад.                 Дар давоми моҳҳои гузашта барои иҷрои барномаҳои умумиҷумҳуриявӣ дар ҳудуди вилоят 18,9 миллион доллари ИМА сарф шуд. Дар ин муддат дар қисмати шимолии мамлакат нисбат ба ҳамин давраи соли гузашта 7,5 % бештар маҳсулоти кишоварзӣ ҷамъ оварда шуд. Аз ҷумла, 122,5 тонна сабзавоти барвақтӣ ба харидорон пешкаш гардид.