МАҶЛИСИ ШЎРОИ ВАЗИРОНИ КОРҲОИ ХОРИҶИИ СААД ДАР МАСКАВ БАРГУЗОР МЕГАРДАД

                   Маскав, 11 июн. (АМИТ «Ховар», Ҳалима Хушқадамова).- Маҷлиси Шӯрои вазирони корҳои хориҷии мамлакатҳои аъзои Созмони аҳдномаи амнияти дастаҷамъӣ 14 июн дар Маскав баргузор мегардад. Дар маҷлис масъалаҳои тавсиаи ҳамкории созмон бо созмонҳои дигари байналхалқӣ, ҳисоботи раиси Шӯрои вазирони корҳои хориҷӣ, вазири корҳои хориҷии Арманистон дар бораи тадбирҳои гузашта, ҷараёни иҷрои қарорҳои мулоқоти ғайринавбатии Шӯрои амнияти дастаҷамъӣ дар бораи ташкили Қувваҳои дастаҷамъии вокуниши таъҷилӣ, муҳайё сохтани заминаи қонунӣ барои истифодаи онҳо ва лоиҳаи созишномаи принсипҳои асосии ташкили системаи идораи махфии ҷузъу томҳои низомиро муҳокима хоҳанд кард.                   Мухбири АМИТ «Ховар» хабар медиҳад, ки дар ин маҷлис вазири корҳои хориҷии Тоҷикистон Ҳамрохон Зарифӣ иштирок менамояд.