МАКТАБҲОИ ОЛИИ ҶТ ДАР ФАЪОЛИЯТИ ДОНИШГОҲИ КУШОДИ ШАБАКАВИИ ИДМ ШИРКАТ МЕВАРЗАНД

                   Маскав, 13 июн. (АМИТ «Ховар», Ҳалима Хушқадамова).- Дар Донишгоҳи «Дӯстии халқҳо»-и Маскав конфронси муассисони Донишгоҳи кушоди шабакавии ИДМ анҷом ёфт. Дар он намояндагони 10 мактаби олии давлатҳои Иттиҳод иштирок доштанд.  Иштирокчиёни конфронс дар бораи таъсиси Донишгоҳи кушоди шабакавии ИДМ, бо роҳҳои муштарак ва якҷоя тайёр намудани мутахассисон, сохтори маъмурии Донишгоҳи нав ва нақшаи таълимии онро мувофиқа ва тасдиқ намуданд.                  Мухбири АМИТ «Ховар» хабар медиҳад, ки аз Тоҷикистон дар фаъолияти Донишгоҳи кушоди шабакавии ИДМ Донишгоҳи славянии Тоҷикистону Русия ва Донишгоҳи миллии мамлакат ширкат меварзанд. Ректори Донишгоҳи славянии Русия ва Тоҷикистон М. Имомов ва муовини ректори Донишгоҳи миллии Тоҷикистон М. Исоматов дар конфронси мазкур иштирок намуданд.                  Ҳадафи ташкили донишгоҳ дар қаламрави Иттиҳоди давлатҳои мустақил бунёд сохтани фазои воҳиди таълимию маърифатӣ ва илмӣ, вусъати ҳамкорӣ ва равобити мактабҳои олӣ, таҳияи барномаҳои муштараки таълимӣ ва ғайра мебошад.