МАРКАЗИ НАВИ ИСТИРОҲАТИИ ҶАВОНОНИ ИДМ

                Минск, 2 июн. (АМИТ «Ховар», Ҳалима Хушқадамова).- 1 июн дар заминаи истироҳатгоҳи миллии тобистонаи бачагонаи «Зубрёнок»-и Ҷумҳурии Белорусия Маркази байналмилалии истироҳатии ҷавонони ИДМ кушода шуд. Маркази мазкур «Дӯстӣ бидуни сарҳад» ном дорад. Ҷавонони мамлакатҳои ИДМ бо навбат дар ин ҷо ду ҳафта истироҳат карда, бо ҳамдигар аз наздик шинос мегарданд. Котиби матбуоти Бунёди байналхалқии ҳамкории гуманитарии давлатҳои ИДМ Александр Калугин зикр намуд, ки дар ин ҷо ҳар ҳафта мулоқоту сӯҳбатҳо, ҷамъомадҳо, мусобиқаҳои варзишӣ ва викторинаю озмунҳо гузаронида мешаванд. Ҳар рӯзи истироҳат дар ин ҷо ба яке аз мамлакатҳои Иттиҳод бахшида хоҳад шуд.                 Дар ташкили марказ Озарбойҷон, Арманистон, Белорусия, Қазоқистон, Қирғизистон, Молдавия, Русия ва Тоҷикистон саҳм гузоштанд. Сарпарастии онро Вазорати маорифи Ҷумҳурии Белорусия, Бунёди байналхалқии ҳамкории гуманитарии давлатҳои ИДМ ва Кумитаи иҷроияи ИДМ ба зимма гирифтаанд.                 Мухбири АМИТ «Ховар» ёдовар мешавад, ки қарори кушодани марказ дар ҷараёни мулоқоти сарони ҳукуматҳои ИДМ дар шаҳри Остона қабул шуда буд.