МУЛОҚОТИ ҲАЙАТИ ИТТИҲОДИ АВРУПО ВА ОСИЁИ МАРКАЗӢ АНҶОМ ЁФТ

                         Душанбе, 1 июн. (АМИТ «Ховар», Наргис Бойахмедова).-Рӯзҳои истироҳати гузашта дар шаҳри Душанбе мулоқоти ҳайати сегонаи Иттиҳоди Аврупо ва вазирони корҳои хориҷии мамлакатҳои Осиёи Марказӣ анҷом ёфт.                         Зимни мулоқот масъалаҳои рушди иқтисодиёт, проблемаҳои экология, истифодаи захираҳои об, таъмини амнияти минтақа, мубориза ба муқобили хариду фурӯши айриқонунии маводи нашъадор, тақвияти муҳофизати сарҳадҳо ва ғайра муҳокима шуданд.Иштирокчиёни мулоқот инчунин, ҷараёни иҷрои барномаи стратегии Иттиҳоди Аврупоро дар Осиёи Марказӣ, ҳуҷҷати таҳриршударо дар бораи афзалиятҳои миллӣ ва нақшаи тадбирҳои Иттиҳоди Аврупо ва давлатҳои Осиёи Марказиро дар мубориза ба муқобили паҳн гардидани маводи нашъадор, вазъияти Афғонистон, Покистон ва Эронро мавриди баррасӣ қарор доданд.                       Мухбири АМИТ «Ховар» ёдовар мешавад, ки ба ҳайати сегонаи Иттиҳоди Аврупо вазири корҳои хориҷии Чехия Ян Когоут, вазири корҳои хориҷии Шветсия Карл Илдт ва намояндаи махсуси Иттиҳоди Аврупо дар Осиёи Марказӣ Пер Морел шомил буданд.