НАМОИШНОМАИ НАВ ДАР ТЕАТРИ ЛОХУТӢ

                   Душанбе, 10 июн. (АМИТ «Ховар», Лутфия Эшонкулова).- Дар Театри давлатии академӣ -драммавии ба номи А. Лоҳутӣ аз рӯи асари адибони тоҷик Низом Қосим ва Ҷума Қуддус намоишномаи нав бо номи «Шов-шов» ба саҳна гузошта мешавад. Директори театри мазкур Ибодулло Машрабов ба мухбири АМИТ «Ховар» хабар дод, ки асар дар замони шуравӣ навишта шудааст, аммо бо ёрии коргардон Зафар Ҷавводов ва драманависон онро ба асари маҳзакаи ҷолиби диққат ва мутобиқ ба замони имрӯза табдил доданд.                    Намоиш дар бораи ғайбати 2 кампир, ки ба муҳаббати ҷавонон дахолат мекунанд ва миш-миши онҳо, ки ба фоҷиа оварда мерасонад, ҳикоят мекунад.                    И. Машрабов зикр намуд, ки аҳамияти ин мавзӯъ дар он аст, ки ғайбат ва Миш-мишу овозаҳои беасосу бардурӯғро маҳкум менамояд, ин зуҳуроти номатлуб имрӯз ҳам дар рӯзгори мо бисёр ба назар мерасад.                    Нақшҳои асосиро ҳунармандони маъруф Марям Исоева, Саврӣ Сабзаалиева, Исо Абдурашидов, Дилбар Умарова ва Соро Сабзаалиева иҷро менамоянд.Нахустнамоиши он дар охири моҳ пешбинӣ шудааст.