НАРХҲО ЧАРО БОЛО МЕРАВАНД?

                Душанбе, 16 июн. (АМИТ «Ховар», Лаззат Диловарзод).- Мутахассисон сабаби боло рафтани нархро аниқ мекунанд,-иброз доштанд дар Вазорати рушди иқтисод ва cавдо ба мухбири АМИТ «Ховар».                Дар давоми ду ҳафтаи охир нархи маҳсулоти хӯрокворӣ, аз ҷумла орд, қанд, шакар, равған, сӯзишворӣ 15-20 фоиз боло рафт, ки ин натанҳо боиси нигаронии аҳолӣ , балки кормандон ва мутахассисони Вазорати рушди иқтисод ва савдо низ гардид.                  Бо мақсади аниқ кардани сабабҳои боло рафтани нарх аз ҷониби Раёсати сиёсати зиддимонополии Вазорати Рушди иқтисод ва савдо гурӯҳи махсуси корӣ ташкил ёфт.                 Бино ба иттилои ҳамин манбаъ, болоравии нарх таъсири худро ба бозорҳо расонд.  Соҳибкорон ва тоҷирон нархи орду қанд, равғану биринҷ ва сӯзишвориро худсарона баланд бардоштанд. Нархи як халта орд як ҳафта пеш 90 сомонӣ қиммат дошт ва он имрӯз дар бозор бо нархи 105 -110 сомонӣ ба савдо бароварда мешавад. Нархи шакар 0, 50 дирам, равған 2 сомонӣ, сабзӣ-0,30, картошка -0,20 дирам боло рафт.                 Гуруҳи кории Раёсати сиёсати зиддимонополии Вазорати рушди иқтисод ва савдо дар ҳамаи бозорҳои шаҳру навоҳии мамлакат сабаби боло рафтани нархро меомӯзад ва ба он баҳо медиҳад.