СММ БА ТОҶИКИСТОН КЎМАК МЕРАСОНАД

                    Душанбе, 3 июн. (АМИТ «Ховар»- Ин.орг).-Раёсати СММ дар масъалаи ҳамоҳанг сохтани кӯмакҳои хайрия дар бораи вазъияти мураккаби бар асари боронҳои шадид дар Тоҷикистон ба амал омада ба мамлакатҳои мададгор хабар дод. Дар хабари СММ гуфта мешавад, ки боронҳои шадиди тӯлонӣ ба сокинони 40 ноҳияи мамлакат зарари калони иқтисодӣ расонданд.                   Дар натиҷа қариб 12 ҳазор нафар сокини Тоҷикистон мӯҳтоҷи кӯмакҳои башардӯстонаи таъҷилӣ мебошад. Аз ҷумла қариб 3 ҳазор сокини истиқоматгоҳҳои муваққатӣ ба оби ошомиданӣ эҳтиёҷи калон доранд.                   Дар робита мамлакатҳои мададгор даъват карда мешаванд, ки ба Тоҷикистон ба маблағи 1,3 миллион доллари ИМА кӯмак расонанд.                   Мухбири АМИТ «Ховар» ёдовар мешавад, ки СММ аллакай бо ин мақсад ба Тоҷикистон барои харидани хайма, сӯзишворӣ ва об ба маблағи 120 ҳазор доллар кӯмак расонд.