ВАЗОРАТҲОИ ДИФОИ ИДМ ҲАМКОРИРО ТАВСЕА МЕБАХШАНД

                       Душанбе, 1 июн.(АМИТ «Ховар», Марзия Саидова).- Лоиҳаи Қонунҳои Ҷумҳурии Тоҷикистон «Оид ба ворид намудани тағйиру илова ба Қонуни Ҷумҳурии Тоҷикистон «Дар бораи рӯзҳои ид», «Оид ба ворид намудани тағйиру иловаҳо ба Кодекси ҷиноятии Ҷумҳурии Тоҷикистон, «Дар бораи мақомоти худидоракунии шаҳрак ва деҳот», Дар хусуси Созишнома дар бораи ҳамкории вазоратҳои мудофиаи давлатҳо — иштирокчиёни Иттиҳоди Давлатҳои Мустақил дар соҳаи назорати вазъи радиатсионӣ, химиявӣ ва биологӣ аз масъалаҳое, буданд, ки дар ҷаласаи Шӯрои Маҷлиси намояндагони Маҷлиси Олии ҷумҳурӣ 1 июн баррасӣ шуданд.                        Роҷеъ ба масъалаҳои зикршуда, раисони Кумитаҳои Маҷлиси намояндагон Абдураҳмон Азимов, Додихудо Саймиддинов ва Сафаралӣ Раҷабов сухан карда, моҳияти онҳоро шарҳ доданд. Зикр шуд, ки раванди рушди ҷомеа ва соҳаҳои мухталифи кишвар тақозои ворид намудани тағйиру иловаҳоро ба як қатор қонунҳои кишвар ба миён овардааст. Аз ин рӯ, мақсад мувофиқ кунонидани қонунҳои амалкунанда ба меъёрҳои кунунии соҳаҳои мухталифи мамлакат мебошад.