А. САТТОРОВ: «ҲАДАФИ МО МОНОПОЛИСТ ШУДАН НЕСТ»

                 Душанбе, 13 июл. (АМИТ «Ховар», Бекназари Абӯбакр). — Бӯҳрони молиявӣ-иқтисодии ҷаҳонӣ ба кам ворид шудани мошинҳои сабукрав таъсир расонид, ки аз ин сабаб ба буҷаи Ширкати давлатии суғуртаи Тоҷикистон «Тоҷиксуғурта» кам маблағ ворид шуд. Ин нуқтаро имрӯз зимни нишасти матбуотӣ директори «Тоҷиксуғурта» Аловиддин Сатторов иброз дошт.                  Ӯ афзуд, ки Ширкати давлатии «Тоҷиксуғурта» ҳадафи дар бозори суғуртавии мамлакат монополист шуданро надорад. Аммо, рақобат байни ширкатҳои суғуртавӣ бояд рақобати солим боша два дар натиҷаи он сифати хизматрасонӣ низ беҳтар мегардад. «Бигзор имрӯз дар бозори суғуртаи ҷумҳурӣ даҳҳо ширкатҳои суғуртавӣ фаъолият кунанд, лекин рақобати солимро ба роҳ монанд, ки тавассути он сатҳу сифати намудҳои суғурта ва хизматрасонӣ баланд гардад», — тазаккур дод А. Сатторов.                  Мавриди зикр аст, ки дар давоми шаш моҳи соли ҷорӣ аз ҳамаи намудҳои суғурта ба буҷаи «Тоҷиксуғурта» 15.675,9 ҳазор сомонӣ пардохт ворид шудааст, ки 110 фоизи нақшаи пешбинишударо ташкил медиҳад. Аз ин шумора 10.896,8 ҳазор сомонӣ ба намудҳои ҳатмии суғурта ва 4.779 ҳазор сомонии дигараш ба намудҳои ихтиёрии суғурта мансуб аст. Дар ин давра Ширкати давлатии «Тоҷиксуғурта» ба шахсони ҳуқуқӣ ва воқеие, ки ба молу амвол ва саломатиашон осеб расидааст, ба маблағи 4.100,5 ҳазор сомонӣ ҷуброни зарар ҳақгузорӣ намудааст, ки нисбат ба ҳамин давраи соли гузашта 1.377,2 сомонӣ зиёд мебошад.