ЛОИҲАИ ПЕШГИРИИ ВНМО (СПИД) МИЁНИ ҶАВОНОН ЯК СОЛИ ДИГАР ТАМДИД ШУД

               Душанбе, 21 июл. (АМИТ «Ховар», Ибодат Давлатова). — Дар ҳамкорӣ бо ташкилотҳои байналмилалӣ ва вазорату идораҳои дахлдор Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон тавонистааст, ки дар самти татбиқи «Барномаи рушди саломатии ҷавонон дар Ҷумҳурии Тоҷикистон барои солҳои 2006-2010» натиҷаҳои назаррасро ноил гардад.                     Тавре аз Кумитаи мазкур иттилоъ доданд, бо мақсади пешгирии бемориҳои махсусан хавфнок миёни ҷавонони деҳот Кумита дар асоси Созишномаи ҳамкорӣ бо Хазинаи глобалӣ оид ба муборизаи зидди ВИЧ/СПИД ва бемории вараҷа дар Тоҷикистон, аз 25 июни соли 2008 Лоиҳаи «Пешгирии вируси норасоии масунияти одам миёни ҷавонони деҳот»-ро давоми солҳои 2008-2009 амалӣ гардонидааст.                    Дар доираи ин Лоиҳа 50 ноҳияҳои ҷумҳурӣ ҳамчун минтақаҳои таҷрибавӣ интихоб гардида беш аз ҳазор нафар ихтиёриён аз ҳисоби ҷавонони фаъол омода гардидаанд. Лоиҳаи мазкур аз шаш соҳаҳои афзалиятнок иборат буда дар татбиқи онҳо ба дастовардҳои муайян ноил гардидааст.                    Ба ҳисоби умумӣ дар доираи Лоиҳа 475384 нафар наврасон ва ҷавонон бо иттилооти таблиғотӣ дар бахши тарзи ҳаёти солим ва омилҳои номатлуби иҷтимоӣ аз қабили хариду фурўши инсон, худкушӣ, ҷинояткорӣ ва муҳоҷират меҳнатӣ фаро гирифта шуданд.                   Лоиҳаи мазкур дар ин давра дар ҳаҷми 1338271 сомонӣ бо дастгирии Хазинаи глобалӣ маблағгузорӣ гардидааст.                   Бо дарназардошти муваффақиятҳои боло ва муҳими проблема Лоиҳаи пешгирии ВНМО миёни ҷавонони деҳот боз барои як соли оянда аз 1 июли соли 2009 то 30 июни соли 2010 тамдид ёфт.