ВАҚТИ ГУЗАРОНИДАНИ ТӮЙҲО ДАР ШАҲРИ ДУШАНБЕ 1,5 СОАТ КАМ КАРДА ШУД

              Душанбе, 6 июл. (АМИТ «Ховар», Лаззат Диловарзод).- Бо қарори Маҷлиси вакилони халқи шаҳри Душанбе аз 1-уми августи соли ҷорӣ вақти гузаронидани тӯйҳо дар шаҳр аз 3 соати муқарраршуда то 1,5 соат кам карда мешавад.              Қабули ин қарор яке аз маҷмӯи он масъалаҳоест, ки дар сессияи 18-уми Маҷлиси вакилони халқи шаҳри Душанбе қабул гардид.              Тибқи қарори Маҷлиси вакилони шаҳри Душанбе раисони ноҳияҳои шаҳр ӯҳдадор карда шуданд, ки дар давоми 5 рӯз дар ҳар як маҳаллаю шаҳрак ташкилотҳои ҷамъиятии ташаббускор таъсис дода шуда, минбаъд дар якҷоягӣ бо онҳо оид ба расонидани иттилооти саривақтӣ ба аҳолӣ ҳамкорӣ намоянд, зеро сабаби бисёр қоидавайронкуниҳо аз рӯи нофаҳмӣ мебошад. Комиссия корхои фаҳмондадиҳиро дар байни аҳолӣ ба роҳ монда, сокинони пойтахтро бо қарор, амр ва супоришҳои шаҳрдорӣ ошно месозад.