ҚАҲҲОРОВ «ОЗОДӢ»-РО ФАТҲ КАРД

                  Душанбе, 11 август. (АМИТ «Ховар», Марзия Саидова).-Қуллаи «Озодӣ», ки баландиаш 6230 метр аст, аз ҷониби кӯҳнаварди тоҷик Шамсуллло Қаҳҳоров фатҳ гардида, парчами миллии Ҷумҳурии Тоҷикистон дар болои он гузошта шуд. Кӯҳнаварди тоҷикро дар фатҳи ин қулла дар экспедитсияи байналмилалии кӯҳнавардӣ гурӯҳи кӯҳнавардони кишварҳои Русия, Белорус, Украина, Молдова, Олмон ва Испания ҳамроҳӣ карданд. Дар ин хусус, 10 август аз лагери базавии кӯҳнавардӣ воқеъ дар майдончаи пиряхи «Москвина» тавассути алоқаи кайҳонӣ ба КВД «Сайёҳ» иттилоъ доданд.                 Тибқи иттилои рохбарияти КВД «Сайёҳ», экспедитсияи байналмилалии кӯҳнавардӣ мутобиқи қарори Ҳукумати Ҷумҳурии Тоҷикистон «Дар бораи дастгирии масъалаҳои туризми экологӣ, кӯҳӣ-варзишӣ ва кӯҳнавардӣ дар Тоҷикистон» экспедитсияҳои байналмилалии кӯҳнавардӣ ба қуллаҳои Исмоили Сомонӣ, Евгения Корженевская ва Озодӣ гузашта истодааст.                 Мутасаддии экспедитсияҳо КВД «Сайёҳ» буда, дар он беш аз 150 кӯҳнавард аз Русия, Белорус, Қазоқистон, Қирғизистон, Литва, Чехия, Словения, Испания, Фаронса ва Эрон иштирок доранд. Ҳадафи асосии кӯҳнавардон фатҳи куллаҳои номбурда аст.                   Инчунин, Шамсуло Қаҳҳоров қабл аз фатҳи қуллаи Озодӣ ҳамроҳи кӯҳнавардони Русия, Чехия, Литва ва Эрон қуллаи Евгения Корженевскаяро, ки баландиаш 7105 метр аст фатҳ намуданд.                   Алҳол гурӯҳи кӯҳнавардони экспедитсияи байналмилалии кӯҳнавардӣ ба фатҳи қуллаи Исмоили Сомонӣ ( баландиаш 7495 метр) омодагӣ мебинанд. Дар назар аст, ки ҳайати экспедитсияи байналмилалии кӯҳнавардӣ нимаи дуюми моҳи август ба Душанбе бармегарданд.