ҲОСИЛИ ФАРОВОНИ ҒАЛЛА

                     Душанбе, 25 август. (АМИТ «Ховар», Кристина Эрлих). — Мӯҳлати ҷамъоварии ғалла дар саросари мамлакат бо сабаби нарасидани техникаи ҳосилғундор дароз карда шуд. Мудири шӯъбаи ғаллапарварӣ ва зироатҳои техникии вазорати кишоварзӣ Муҳаммадӣ Ормонов ба мухбири АМИТ «Ховар» гуфт, ки айни ҳол дар мамлакат техникаи махсуси ҳосилғундор, аз ҷумла комбайнҳо намерасанд. Ҳоло дар хоҷагиҳои мамлакат бештар аз 300 комбайн шабу рӯз кор мекунад. Ҳосили баъзе китъаҳои ғаллазор илова бар ин дастӣ даравида ва ҷамъ оварда мешавад.                    Мутахассисони вазорати кишоварзӣ ва муассисаҳои озуқаворию кишоварзии Созмони Милали Муттаҳид дар давоми як моҳ ба ҳамаи минтақаҳои мамлакапт рафта, ҳаҷми ҳосили ғалларо тақрибан муайян намуданд. Ба ақидаи онҳо, соли 2009 дар Тоҷикистон як миллиону 145 ҳазор тонна ғалла ба даст оварда хоҳад шуд. Бояд гуфт, ки ба ин ҳисоб ҷуворимаака барои дон, шолӣ ва ҳосили ғаллаи кишти такрорӣ дохил намешавад.                    Мухбири АМИТ «Ховар» хабар медиҳад, ки то имрӯз дар мамлакат 643 ҳазору 785 тонна ғалла ҷамъ оварда шуд. Аз ин ҷумла, 595 ҳазору 22 тонна гандум мебошад, ки ҳосилнокии он аз ҳар гектар 27,2 сентнерро ташкил медиҳад. Тарҷумон — Қудратов А.