БАРАНДАГОНИ ГРАНТҲОИ КУМИТАИ ҶАВОНОН

                   Душанбе, 26 август. (АМИТ «Ховар», Ибодат Давлатова). — Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон баҳри иҷрои қарори ҲҶТ «Оид ба грантҳои ҲҶТ барои иттиҳодияҳои ҷамъиятӣ дар соҳаи тарбияи ватанпарастии ҷавонон» ҳамасола озмун доир менамояд.                    Бахшида ба ин 25 августи соли ҷорӣ дар Кумитаи ҷавонон, варзиш ва сайёҳии назди ҲҶТ, бо иштироки раиси Кумитаи мазкур Маликшо Неъматов ба панҷ ғолибони озмун грант дар ҳаҷми 10000 сомонӣ супорида шуд.                    Тавре Маликшо Неъматов дар баромади худ қайд намуд, озмун тариқи воситаҳои ахбори умум, хуб ба роҳ монда шуда, шартҳои он ба таври возеҳу равшан инъикос шуда буданд. То мӯҳлати муқарраргардида аз ҷониби 18 иттиҳодияи ҷамъиятӣ лоиҳаҳо пешниҳод гардиданд, ки онҳо тамоми минтақаҳои мамлакатро дар бар мегиранд. Аз онҳо 5 иттиҳодияҳои ҷамъиятии «Занони деҳот» аз ноҳияи Тавилдара, «Маркази тадқиқоти журналистӣ» аз шаҳри Душанбе, «Шото» аз шаҳри Исфараи вилояти Суғд, «Зуҳал» аз ноҳияи Фархори вилояти Хатлон ва «Шоҳин» аз ноҳияи Файзобод бо бартарияти баҳои ба даст оварда, мазмуну мӯҳтавои лоиҳаҳо, минтақаҳои фарогир ва риояи дурусти шартҳо ғолиби озмун эълон карда шуданд.