БОНКИ МИЛЛӢ ФОИЗИ МЕЪЁРИ БОЗТАМВИЛРО ПАСТ КАРД

                      Душанбе, 3 август, (АМИТ «Ховар», Покиза Маҳмадбекова). — Бонки миллии Тоҷикистон меъёри бозтамвилро дар ҳаҷми 1 фоиз (аз 9 то 8 дарсад) паст кард.Аз рӯи иттилоъи Бонки миллӣ, дар соли ҷорӣ бонк бори чорум аст, ки фоизи баргаҳои қарзиро пойин мебарад. Дар аввали сол ин нишондод дар Тоҷикистон 13,5 фоизро ташкил медод. Дар моҳи май аз 12 то 10 фоиз ва аввали моҳи июл аз 10 то 9 фоиз паст карда шуда буд.                       Инчунин, қобили қайд аст, ки имрӯз бозорҳои шаҳри Душанбе қурби миёнаи хариду фурӯши доллари амрикоӣ бетағйир монда ба ҳисоби миёна ба 4,43 — 4,45 сомонӣ баробар шуд. Қурбҳои миёна аз рӯи амалиёти рубли русӣ ва евро бошад бетағйир монда, мувофиқан 1,40-1,41 сомонӣ барои 10 рубли русӣ ва 6,17-6,23 сомонӣ барои 1 евро ташкил намуданд.                       Қурби миёнаи хариду фурӯши доллари ИМА дар бахшҳои байнибонкӣ ва дохилибонкии бозор аз рӯи амалиётҳои гузаронидашуда, бештар дар ҳудуди 4,39 — 4,42 сомонӣ расида, бо ин сабаб қурби расмии мубодилавии доллари ИМА аз 4,3906 то 4,3900 сомонӣ барои 1 доллари ИМА паст шуд.