ЧАҲОР НУҚТАИ ФУРӮШИ АФЮН БАРҲАМ ДОДА ШУД

                 Бадахшон, 28 август. (АМИТ «Ховар», Л. Додо).- 4 моҳ қабл гурӯҳи ҷавонони шаҳри Хоруғ тариқи радиову телевизиони маҳаллӣ ва рӯзномаи «Бадахшон» ба сокинони маркази вилоят муроҷиат намуданд, ки дар рафъи вабои аср: нашъамандӣ бояд ба мақомоти қудратӣ мадад расонд. Ва ҳамин тавр ҳам шуд.                 Рӯзи 27-уми август дар ҷаласаи Шӯрои ҳамоҳангсозӣ оид ба пешгирии нашъамандию нашъаҷаллобӣ дар шаҳри Хоруғ натиҷаи муроҷиатнома мавриди муҳокима қарор гирифт.                 Садри бахши вилоятии Агентии назорати маводи мухаддир Муродҳусейн Алиёров дар Шӯро иттилоъ дод, ки дар давоми чаҳор моҳи охир бо кӯмаки аҳли ҷомеа мубориза бо гардиши ғайриқонунии маводи мухаддир дар шаҳр пурзӯр гардид. Дар натиҷа чаҳор нуқтаи фурӯши маводи мухаддир барҳам дода шуда, яке аз нашъафурӯшон дастгир гардид.